Tcell дар деҳаҳои дурдасти водии Бартанг алоқаи 3G-ро таъмин кард

Tcell дар деҳаҳои Сипонҷ, Дашт ва Хидҷез дар водии Бартанги ВМКБ алоқаи 3G-ро ба кор даровард. Ин имконият дод, ки сокинони маҳаллӣ бори аввал ба интернети мобилии устувор дастрасӣ пайдо кунанд.

Лоиҳа бо дастгирии Хадамоти алоқаи назди Ҳукумати Ҷумҳурии Тоҷикистон амалӣ гардид. Насби пойгоҳҳои базавӣ дар минтақаи кӯҳии дастнорас, ҳалли логистикаи махсус ва мувофиқаҳоро талаб кард.

Озодхон Давлатшоев, директори генералии Tcell:

«Барои мо муҳим аст, ки алоқаи муосир дар тамоми кишвар дастрас бошад. Ҳоло сокинони ин деҳаҳо метавонанд аз интернет барои муошират, таҳсил ва дастрасӣ ба иттилоот истифода баранд».

Парвиз Мамадзиёев, директори техникии Tcell:

«Ин лоиҳа нишон дод, ки ҳатто дар шароити душвортарин низ метавон алоқаи босифатро таъмин кард. Мо аз Хадамоти алоқа барои кумак дар татбиқи ин лоиҳаи муҳими минтақавӣ миннатдорем».

Ба кор андохтани алоқаи 3G дар водии Бартанг ба стратегияи рушди инфрасохтори телекоммуникатсионии Tcell дар саросари Тоҷикистон мувофиқ аст.